De 7. Oktober haten d’Guiden a Scouten St Pirmin vum Séi hiert alljäerlecht Wisefest. Mir hunn eist Fest mat enger Mass hannert dem Chalet ugefong. (Foto 1) Mëttes ware wéi gewinnt Spiller an Aktivitéiten fir Grouss a Kleng. D’Thema vun dësem Joer war „Dschungel“.

All Branche huet flott Aktivitéiten zu dësem Thema ugebueden. Sou goufe mat de Biberchefs Déieremaske gebastelt a Gesiichter gemoolt. (Foto 2) D’Wëllef haten eng Schéissbud opgeriicht op där di wëll Déieren (a vläicht och bëssen d’Chefs hannendrun) mat naasse Schwämm ofgeschoss gi sinn.(Foto 3) Bei den Avex huet ee misse säi Gläichgewiicht ënner Beweis stellen fir gutt duerch den Dschungel duerchzekommen. (Foto 4) D’CaraPio haten een Dschungelcamp virbereet mat engem Grujelparcours fir duerchzekrauchen a lauter lecker Saachen fir ze schmaachen an ze taaschten. (Foto 5) An d’RaRo haten ee Kloterparcours gebaut mat Spannennetz (Foto 6) an Tarzanlian. (Foto 7)

Et war also fir jiddereen eppes dobäi. Leider war just d’Wieder grad deen Dag am mannste schéin verglach mat allen Deeg virdrun an dono, mee sou ass dat alt am Dschungelalldag.  (Foto 8 )

Fotoen: Nico Berté

Foto 1:

Foto 2:

Foto 3:

Foto 4 :

Foto 5: